(1909) ¡Probe Neñina! (Penes fondes)
El sol per ocaso
majín s'esmorciella
y allá pe los picos llexanos y pelras...
Al pocu na' rmita
que veis' a la izquierda,
fincada 'n cimero del monte xigante
pau baxan dacuando las águilas ñegras,
solina campana
suavivo se quexa
doliosa llanciando pal valli dormíu
del Anxelus gravi la tristi sonera...,
y enriba del llanu
y enriba la veiga
la lluna de plata guapina s'empruna
y entaman el tiemblu de las majas estrellas...!
les aves non fierven
sos cántigas tienras...,
nalanon al ñeru malbises y alondras,
nalanon al ñeru las suaves xilgueras...;
non ois' el regatu
ruxir pe la herba...,
non ois' el marmuriu d'acutio del río...,
non ois' una nota pe la carbayera...;
non múvese nada...
non tembla una fueya...,
uquiera silencio y uquiera ñostalxia...
¡plasmóse Ñatura..., plasmós' en concencia!...
Al par de la fonte
s'alcuentra la neña...
la pelra lluciente d'aquella quintana
de cases blanquines que ta'n arboleda,
la neña salada...,
la neña melgueira...,
la fresca rapaza de frenti de ñieve...,
de llabios tan vivos com' una cereiza
de güeyos azules
qu'al lliriu semeyan...,
la maya guapina de trences radiantes
que' al oru y al trigu yos fan competencia...
Al par de la fonte
la neña s'alcuentra
nel blandu regazu cruciaes les manines...
los curros güeyinos clavaos é na tierra...;
non canta la maja...,
non canta la reina...,
...¡paézs' á la virxen que ta so les tumbes
au mira sos dichas pa'n siempre ya muertas!...,
paéz la calandra
d'amores ¡ay! güérfana
que nal' ablucada pal bosque sombríu
y al bosque sombríu sos penes i cuenta...;
ta tristi... ¡muy tristi!...
la neña chicera...,
ta tristi... ¡más tristi que tan los cepreses
qu'allá na Belonga la brisa ximielga!...;
ta tristi... tristina...m
non hay más que vela...;
ta tristi... ¡más tristi que taba'n Calvariu
la Madre de Cristo sentada nas piedras!...;
da pena miralla,
miralla da pena...
...¡quién, coni, podiera facela reyise!...,
quitai los pesares ¡ay Dios, quién podiera!...
...¿Qué tien la mocina?
¿qué tien ¡ay! la prenda?...,
¿qué tien la soltana, lluceru del alba...,
xentil palombina qu'adora l'aldea?...
...¡Y llora!... ¡probina!...
¡y llora, rediezla!...
mirai cómo tapa la ñidia carina
col so mandilucu qu'en llágrimas mueya...,
¡sandiez!... ¡qué penona
pasando ta ella!...,
¡sandiez!... ¡qué martillos tan grandis l'ablucan!...,
¡sandiez!... ¡como sufri la mio macarena!...;
la fonte da l'agua...,
la xarra ya lo echa...,
la neña no atinde..., ¡non fai casu nada!...m
la neña 'n so sitiu ximiendo se queda...;
agora llevanta
¡mirái!, la cabeza...
ya muvi los llabios..., ¡a ver qué falancia!...
a ver qué degorrios de duelu l'afuega...
"¡Ay, Virxen del Carmen!...,
¡que güelva!, ¡que güelva!...,
¡que güelva 'nseguida de 'llá de la guerra!..."
¡que non me lu maten
las balas rifleñas!...,
¡que güelv' al mio lladu pa feme compaña...
pa dimos xuntinos riyendo á la fiesta!..."
Talmente sospira
la probe Perfeuta,
mentanto resbarian ansina d'a puño
dos llágrimas gordas nas soyas mexellas...
...Ya veis por qué sufri
la Fílida fresca...
la Maya guapina de trences radiantes
qu'al oru y al trigu yos fan competencia...
...Por eso les aves
nalanon apriesa...,
por eso non oise marmuriu de río...
nin nota dolcina de la carbayera...
por eso, barrunto
non tembla una fueya
por eso hay uquiera silencio y ñostalxia
¡por eso Ñatura plasmós' en concencia!...;
ta tóo tristino...
ta tóo 'n tiñiebla...,
ta tóo dormío com' un camposantu...
¡ta tóo llorando la pena la neña!...